વાર્તા - શશિ શ્રીવાસ્તવ.
પથારીમાં ઊંઘેલી અંજલિની આંખમાંથી ઊંઘ માઈલો દૂર હતી. તે વિચારી રહી હતી કે તેના જીવનમાં આ ઊથલપાથલ કેવી રીતે થઈ? પૂરી રાત વિચારોમાં વીતી ગઈ.
તેણે સવારે ૧૦ વાગે ઓફિસે જવાનું હતું, પણ તેનું મન નહોતું. તે વિચારવા લાગી... ગયા વર્ષે તેના અમન સાથે ધામધૂમથી લગ્ન થયા હતા.
અમનને ઘણા સમય પહેલાંથી જાણતી હતી.
બંને કોલેજમાં સાથે ભણતા હતા.
હંમેશાં બંનેના ઘરના પરિવાર પણ હળતામળતા રહેતા હતા.
બંનેના પરિવારને આ લગ્ન મંજૂર હતા. તેથી લવ મેરેજ એરેન્જ મેરેજમાં ફેરવાતા વાર ન લાગી.
લગ્ન પછી અમને અંજલિને ખૂબ પ્રેમ અને માન આપ્યા. તેથી અમન સાથે લગ્ન કરીને અંજલિ સ્વયંને ખૂબ ખુશહાલ સમજી રહી હતી.
સમસ્યા ત્યારે થઈ જ્યારે તે રાત્રે ફોન આવ્યો.
ફોન અમન માટે હતો. કોઈ મહિલા હતી. તેણે કહ્યું. ‘‘પ્લીઝ અંજલિ, ફોન અમનને આપ.’’
ફોન સાંભળીને અમન બેચેન થઈ ગયો. અંજલિએ પૂછયું તો કહ્યું, ‘‘કાકીનો ફોન છે.’’ અને કહ્યા સાંભળ્યા વગર નીકળી ગયા.
સવારના ૪ વાગ્યે આવ્યો ત્યારે ઉદાસ અને પરેશાન હતો.
અંજલિએ તેને પરેશાન જોયો પણ અત્યારે પૂછવું યોગ્ય નથી. વિચાર્યુ કે આરામથી પૂછશે, પણ સવારે ઘરના કામથી તેને નવરાશ ન મળી અને રાત્રે પૂછે તે પહેલાં તેનો ફોન આવ્યો.
અંજલિના ફોન ઉઠાવતા જ તે મહિલાએ કહ્યું. ‘‘અંજલિ અમનને જલદી ફોન આપ.’’ અંજલિ બોલાવે એ પહેલાં જ અમને હાથમાંથી ફોન લીધો. અંજલિ કિચનમાં હતી.
થોડી વારમાં અમને કહ્યું, ‘‘ચિંતા ન કરો, હું હમણાં આવું છું.’’ અમન કોઈને કહ્યા વિના ગયો.
અમન અંજલિના વારંવાર પૂછવા છતાં કંઈ ન કહી શક્યો.
હવે જ્યારે ફોન આવતા અમન બહાર નીકળ્યો ત્યારે અંજલિ પણ સાવચેતીથી તેની પાછળપાછળ નીકળી ગઈ. તેણે નિશ્ચય કરી લીધો કે આજે હકીકત જાણીને રહેશે.
આ મહિલા કોણ છે? મને પણ ઓળખે છે. અમન તેના વિશે કંઈ કહેતો કેમ નથી?
શું ખોટું થઈ રહ્યું છે? અમન ની કાર જાણીતી હોટલ સામે ઊભી રહી. તે સીડીઓ ચઢીને ઉપરના માળે ગયો. અંજલિ પણ તેની પાછળ ગઈ.
અમન એક રૂમમાં ગયો અંદરથી દરવાજો બંધ થયો.
થોડી વાર પછી બંને બહાર ગયા. અંજલિ જાણવા ઈચ્છતી હતી કે આ બધું શું થઈ રહ્યું છે, પણ ઓફિસ માટે મોડું થાય. તેથી કમને ઓફિસ માટે નીકળી ગઈ.
તે ઓફિસ આવી પણ તેનું મન કામમાં લાગતું નહોતું. તેનું ધ્યાન તો હોટલના રૂમમાં થઈ રહેલ હલચલમાં હતું.
તે વિચારતી હતી કે શું અમન હજી હોટલમાં હશે અથવા ઓફિસ ગયો હશે.
તેણે અમનની ઓફિસમાં ફોન કર્યો ત્યારે ખબર પડી તે ૨ દિવસથી ઓફિસ નથી આવ્યો, અંજલિ આશ્ચર્યચકિત થઈ ગઈ કે જો ઓફિસ નથી જતો તો ક્યાં જાય છે?
ઘરેથી તો સમયસર ઓફિસ માટે નીકળી જાય છે, તેણે વિચાર્યું કંઈક તો ગરબડ છે.
