સ્ટીમ્ડ ઈંસ્ટન્ટ દહીં વડાં

સામગ્રી :

• ૫ મોટી ચમચી અડદની દાળનો પાઉડર
• ૨ મોટી ચમચી ધોયેલી મગ દાળનો લોટ
• ચપટી હિંગ
• ૧ નાની ચમચી જીરું પાઉડર
• ૧/૨ નાની ચમચી લાલ મરચું પાઉડર
• ૧ નાની ચમચી આદું અને લીલાં મરચાં સમારેલાં
• ૯-૧૦ કિસમિસ
• ૧ મોટી ચમચી કાજુની કતરણ
• ૧ નાની ચમચી ચારોળી
• ૨ કપ દહીં
• સંચળ અને સફેદ મીઠું સ્વાદ મુજબ.

અન્ય સામગ્રી :

• ૬-૭ લીમડો
• ૧/૨ નાની ચમચી રાઈ
• ચપટી હિંગ
• ૧/૨ નાની ચમચી જીરું
• મીઠી લાલ ચટણી અને લીલી ચટણી
• ૧ નાની ચમચી તેલ.

રીત :

બંને દાળને ૧/૨ કપ પાણી રેડીને મિક્સ કરીને ૧/૨ કલાક ઢાંકીને રાખો. પાણી ઓછું લાગે તો થોડું ઉમેરી દો ત્યાં સુધી ફીણો જ્યાં સુધી દાળ પાણીમાં તરવા ન લાગે. હિંગ અને ચપટી મીઠું નાખો. ડ્રાયફ્રૂટ, આદું અને લીલાં મરચાં મિક્સ કરો. ઈડલી મોલ્ડમાં થોડું મિશ્રણ લો. પછી ડ્રાયફ્રૂટ ભભરાવો અને ફરીથી દાળના મિશ્રણથી ઢાંકી દો. લગભગ આ રીતે ૮ વડાં બનશે. ઈડલીની જેમ વરાળમાં ૧૦ મિનિટ પકાવો. ઠંડા થતા બહાર કાઢો. ૧ નાની ચમચી તેલમાં હિંગ, જીરું, રાઈ અને લીમડાનો વઘાર કરો અને ૨ કપ નવશેકા પાણીમાં ઉમેરી દો. તેમાં વડાં ૫ મિનિટ માટે નાખો. પછી નિતારી લો. દહીં, ગળી અને ખાટી ચટણી, મીઠું, મરચું અને જીરું ભભરાવીને સર્વ કરો.